Claude – woordvriend

Calude Vosloo, teksversorger van Dantjie se vertelwerk.

Claude Vosloo, die enigste ou vir wie Dantjie toelaat om in haar stories te spook.

Claude – woordvriend

“Moenie vra of die glas halfvol of halfleeg is nie, dis net ʼn woordgreep,” reken woordvriend Claude vir Dantjie. “Kry eerder ʼn glas wat by jou kapasiteit pas, dan loop dit gouer oor.”

Dantjie eers diep hieroor na, want hierdie woordvriend Claude Vosloo het met sy onderneming, Kreatiwiteitshuis, teksversorging herontwerp om die boekmense te dien en vir sy gesin te voorsien. Hy het die konsep van tekskontrakteur bekendgestel: boekmaker en inhoudskepper saam met die ander teksversorgtake – die gawe van tekstimmer. Daarmee saam tree hy op as die berggids wat skrywers en uitgewers deur die steil, kronkelende passe begelei. Hy het meer as 20 jaar se ervaring in alle aspekte van die uitgewerswêreld en ken die siel van die miernes. Deur sy webwerwe fokus hy op spookskryf, projek- en prosesbestuur vir uitgewers landwyd (ook met die omtimmer van konsepte wat oënskynlik nie publiseerbaar was nie). Hy skryf ook self en vertaal na beide tale (Afrikaans/Engels) as hy hom die kans gun. Daarby tree hy op as kreatiwiteitskonsultant by tersiêre instellings waar hy dosente met akademiese teks prosesbegelei en as teksmentor vir nagraadse studente die volledige pakket lewer: taalhantering en teksversorging saam met timmergrepe en voorstelle oor die argumentlyn, logiese struktuur en tegniese begeleiding oor konsekwente sisteme.

Die motto vir Kreatiwiteitshuis is: Moenie buite die boks dink nie; herontwerp die boks.

Behalwe lat Dantjie van slagspreuke hou, pas hierdie leuse haar natuurlik soos ‘n uitgetrapte velskoen. En Dantjie is baie gemaklik met die fatsoen so, want Claude se manier van woorde bewerk, verwerk en oorwerk is eg, aards en kreatief, krap nie Dantjie se vel nie, kruip nie ongenooid onder haar vel in nie, maar het eerder ongesiens in haar hart kom inkruip. En dis okay, want Dantjie se stories gebruik dan juis woorde wat kan vlieg, maar in jou hart kom land.

“Ons maak ‘n gedugte span,” sê Dantjie, “want Claude se voorstelle en my verbeelding loop meesal hand-aan-hand langs dieselle praatpad.”

—————————————————————————————————————————

Plaasstoriespan: Skrywer Dalene de Bruyn Joubert, teksversorger Claude Vosloo, kunstenaar Grethe Rousseau, grafiese ontwerper/setter Tania Bester, verspreider Xavier Nagel en drukker Hettie Groenwald van Graphics & Printing.